Comeza hoxe a nosa andaina, unha viaxe fermosa polas nosas verbas, a nosa literatura, os nosos costumes, os nosos recunchos.

Coa idea de ir vivindo a nosa cultura, benvido a esta xanela na que agardamos con ilusión a túa visita.

domingo, 25 de noviembre de 2012

Praia de Carnota


   Na costa da provincia da Coruña, cara ao sur, atópase o concello de Carnota.
   Cuns 42km. de litoral, dende O Pindo ata Lariño, conta con 33 fermosas praias e marabillosos areais.



   Hoxe, Manuel Pedre de 3º ESO-A, achéganos esta foto da praia de Carnota.
   Con forma de media lúa, chegou a ser recoñecida nunha revista xermana, coma unha das cen mellores praias.
   No corazón da mesma, a desembocadura do río Vadebois ofrece un marabilloso espectáculo na chamada Boca do Río.
   Sen dubidalo... paga a pena visitala e camiñar pola súa fina area que bica ao mar.
   Grazas Manuel.

domingo, 4 de noviembre de 2012

POEMA

 
Andrea Grande García, alumna de Bacharelato, mergúllanos por un momento nun mundo cheo de cor e vida que nos regala a natureza, a través do seu poema e desas fantásticas imaxes que o acompañan. Grazas, Andrea, pola túa aportación.
 
 
 

SAMAÍN

    O pasado día 31 celebramos o Samaín e con tal motivo o noso blog estreou cabaza e arañiña.
   Agardando a túa participación, espera os teus comentarios, debuxos, lendas, pasatempos e fotos relacionadas con esta festa.
Decídete xa!!!

jueves, 18 de octubre de 2012

Comezando o novo curso

Acabado o verán, regresamos ao colexio coa ilusión de encontrarnos novamente cos compañeiros, de compartir novas vivencias... DE APRENDER.
Dende o noso blog, tentaremos seguir dando forma e enchendo este espazo no que expresarnos na nosa lingua, dar a coñecer a cultura da terra, os lugares que visitamos... a nosa creatividade. E para iso, precisamos novamente da túa colaboración. Agardamos imaxes da túa aldea e algunhas liñas sobre ela, os teus poemas e textos en Galego, a lembraza dalgún dos nosos devanceiros, novas de interese... Fala coa túa mestra.
COMEZAMOS XA!!!!

martes, 19 de junio de 2012

"Duelo de titáns"

Da man de Laura Blanco de 3º ESO-A chega hoxe ao noso blog este divertido debuxo dun coello e un cazador.


O cazador, vendo o coello di: " Hoxe a cea vai ser monumental!"
O coello mirando para o cazador, pensa:" Hoxe, unha gorra nova para a colección".
Poñerse no lugar do outro, a realidade vista dende distintos enfoques, o cazador cazado, cada un mirando para o seu... son moitos os temas a debater tralo debuxo.
Grazas Laura polo sorriso e por facernos pensar.

jueves, 7 de junio de 2012

De volta a Santiago

Coma se do noso propio libro de recordos se tratara, o noso blog abre o álbum da visita ás cubertas da Catedral de Santiago para disfrutar destas fermosas fotos tomadas por Marco Antonio Álvarez Sánchez de 3º ESO C. Grazas Marco.











miércoles, 6 de junio de 2012

Atenea e o Centauro

Ás veces, o bulir do día a día permite que teñamos un acougo para saborear un bo libro, unha sutil melodía, unha amena tertulia ou un cadro que nos leve a outros mundos.
Así é o caso deste debuxo feito por Sandra Trigo García de 4º da ESO, inspirado na obra de Botticelli: Palas Atenea e o Centauro.
A riqueza dos detalles, das proporcións; a delicadeza da técnica do pastel... levan a nosa ollada ao tempo no que os deuses que habitaban no Olimpo, xogaban, se cadra con certo capricho, co destino dos homes.

Grazas Sandra, por tan fermoso agasallo, por mimar con detalle o debuxo e por levarnos a paraxes mitolóxicas cheas de imaxinación, seres sobrenaturais, heroes e deuses.

Agora só queda que vos animedes a adentrarvos na maxia dos mitos, que coñezades as historias de Atenea, Minerva para os romanos e outros tantos deuses. Ben seguro que disfrutaredes con elas.

martes, 29 de mayo de 2012

Cómic


Unha vez máis, Sandra Trigo, alumna de 4º ESO, sorpréndenos cun cómic baseado no relato "Sobre a morte do Bieito", o cal podemos encontrar na obra de Rafael Dieste: Dos arquivos do Trasno.


miércoles, 25 de abril de 2012

Carteis de promoción

A través destes carteis é como os alumnos de 4º ESO promocionan o noso blog polo colexio.

 


Natalia Barral e Tania Martínez


Nerea García


Iria Varela e María Domínguez


Andrea Balado e Marta Domínguez



 Inés Guerra e María Olmo


 Blanca Lodeiros e Beatriz Muñiz

 

 David Moure e Javier Merayo


 Nerea Suárez e Pablo Mayo

 Nahir Couceiro e Sofía Fernández

 


 Alejandra Pardo e Lucía Lodeiros

Alba García e Laura Lobón

 

Grazas a todos por colaborar.

lunes, 23 de abril de 2012

Día das Letras Galegas 2012

Salomé Velo, alumna de 1º de Bacharelato, lémbranos a traxectoria da figura homenaxeada este ano no Día das Letras Galegas : Valentín Paz Andrade.




Día das Letras Galegas 2012



Valentín Paz Andrade


Neste ano 2012 o Día das Letras Galegas está adicado a Valentín Paz Andrade (Pontevedra, 1898- 1987). Foi político, xurista, escritor, empresario e xornalista.
Estudou Dereito en Santiago de Compostela e durante a súa etapa académica participou no movemento galeguista e tamén comezou o seu labor como escritor coa publicación en 1921 deSoldado da morte.
Dende mozo, este pontevedrés rodeouse de importantes personaxes como Ramón Cabanillas e Castelao con quen traballou no xornal Galicia de carácter liberal e democrático. A publicación de dous artigos neste xornal, levouno dous meses ao cárcere. Tamén colaborou con xornais como Faro de Vigo e El Pueblo Gallego, entre outros.
No mundo da política, Paz Andrade foi candidato ás Cortes Constituíntes e anos máis tarde participou na redacción do Estatuto de Autonomía de Galicia. A vida política do pontevedrés volveu a ser importante coa chegada da democracia, xa que foi elixido senador por Pontevedra nas eleccións de 1977.
Hai que destacar que sempre mostrou un gran interese polos galegos e pola súa terra, Galicia. Tamén, desde sempre estivo interesado nos temas pesqueiros.
No mundo empresarial, Paz Andrade foi un dos impulsores e vicepresidente da industria Pescanova e técnico da FAO.
Escribiu ensaios literarios nos que amosaba a súa preocupación por Galicia e o seu progreso. Destacan Castelao na luz, que é unha das biografías máis completas sobre este autor, e na sombra e Galicia como Tarea. Tamén publicou numerosas obras sobre temas pesqueiros como Los derechos sobre el espacio marítimoou Sistema económico de la pesca en Galicia.
Valentín Paz, pertence á Xeración de 1925 e na poesía mostra o seu amor por Galicia e a súa xente como ben podemos ver en Asementeira do vento na que fai referencia á paisaxe, ás xentes, ao exilio e tamén ós poetas galegos.
En Pranto matricial evoca a morte de Castelao. En poesía tamén publicou Cen chaves de sombra e Cartafol de homenaxe a Ramón Otero Pedrayo.
Cómpre destacar que este gran personaxe foi membro da Real Academia Galega e foi premiado co Pedrón de Ouro, a Medalla Castelao e o Premio Trasalba da Fundación Otero Pedrayo, entre outros.

                                                                       Salomé Velo Fernández . 1º Bacharelato






 

jueves, 22 de marzo de 2012

DEBUXOS

Sandra Trigo, unha alumna de 4º da ESO, achéganos uns debuxos do Castelo de Santo Antón e da Torre de Andrade.





j

martes, 13 de marzo de 2012

Listado de blogs

Incorporamos hoxe o enlace directo a dous blogs. Podedes acceder aos mesmos pinchando sobre eles. Verédelos na columna da dereita.
A TOPE TROITA. O mundo da bici da man de caras coñecidas por nós: NICOLÁS COTOS (3ºESO A), MIGUEL PÉREZ (3ºESO B) e JAVIER MERAYO (4ºESO B).
PENSAMENTOS DE PORCO BRAVO. A creatividade de Pedro Bouza de 2º ESO, sempre abraiante.

Paga a pena que os visitedes e, de volta... deixade por aquí un comentario co que vos pareceron.

Por certo... se tes un blog ou calquera outra iniciativa, mándanos un correo e valoraremos a posibilidade de enlazala aquí.

jueves, 8 de marzo de 2012

As cubertas da Catedral de Santiago


Frío.
Ilusión.
Un pouco de sono.
Expectativas.
Non sabíamos que iamos ver tan ben a catedral, que a iamos desnudar daquela maneira. Por fóra é bonita, pero por dentro gaña mil veces ese encanto. As cabalerizas, agora vacías, sen vida. A cociña, máis arriba (polo que tivemos que subir o primeiro tramo de escalóns de todos os que iamos subir posteriormente). Na cociña, pequena e recollida, explicáronnos o que víamos: a enorme cheminea, os costumes e labores que alí se levaban a cabo, o burato que está ó carón da cheminea, por onde se arroxaban os restos de comida cara ós cabalos…
Máis escalóns, cada vez máis altos . Para que? Pois para que, en caso de ataque, chegasen moi cansos ás cubertas e non tivesen forzas para loitar.
Subimos ata o coro por unha das torres. Mmm…que cheiro a incienso…Si, na misa de hoxe pola mañá estivo o botafumeiro a funcionar. Dende o coro podemos ver perfectamente toda a igrexa, coa súa perfecta pranta de cruz latina. Impresionante xenialiadade.
Volvemos sobre os nosos pasos e seguimos subindo escalóns e escalóns.
Parece que nunca vamos chegar cando…buaaa. É precioso!  Sínteste como o rei do mundo. Todo está ó teu redor, todo o podes ver, aínda…
Máis frío; moitísimo frío.
Aínda que agora non merece a pena pensar niso, se non abrir ben os ollos e quedarse con aquelas imaxes grabadas. Vemos a Cruz dos Farrapos, onde os peregrinos queimaban as ropas non reutilizables, por causa das pestes e das enfermidades. E tódalas chemineas nos tellados, coma setas no campo. Precioso. Damos unha volta polas cubertas e pronto preguntámonos como alguén puido ter semellante idea na cabeza e plasmala daquela forma na realidade.
Máis entón…
Frío, si, máis frío.

Alicia Fuentes coa colaboración de: Iván Veloso, Raquel García, Javier Castelos, Antonio Ledo e Fernando Gómez – 3º ESO C
Preparados para entrar


Son moitas as imaxes que temos da visita, así que... non dubides en volver por aquí. Agardamos os teus comentarios.

miércoles, 22 de febrero de 2012

Segundo ensaio da Orquestra Sinfónica de Galicia

     O pasado xoves dezanove, o terceiro curso da ESO, do Colexio Sagrado Corazón Franciscanas, tivo a sorte de asistir a este ensaio no que  puideron apreciar as obras: Peere Grynt ” de E. Grieg, “ En un mercado persa “ de Ketelbey, e a última “ Alladin “ de Carl Nielsen ( por un problema técnico no programa, non se representou ).
     O director de dito ensaio é Víctor Pablo Pérez, está considerado un dos mellores directores do noso país. 
     Este ensaio dura aproximadamente unha hora, contando que o director non queira volver a repetir ningún pasaxe.
     A primeira obra, é un drama do escritor noruego Henrik, ven do Nacionalismo Escandinavo, foi escrito en 1867, e a primeira representación en Oslo o 24 de febreiro do 1876, coa música incidental , do compositor tamén noruego E. Grieg. É unha das denominadas danzas árabes máis famosas.
     A segunda obra, está relacionada coa música en Inglaterra. É unha pequena peza da música escrita en 1920, moi popular pola súa forza descritiva e pola fermosa melodía que contén. Con esta obra, Ketelbey, intentou pintar coa música o bulicio dun mercado de Bagdad, e o consegue.

     A terceira obra ( coa que non puidemos deleitarnos ), é unha historia de orixe sirio Das Mil e Unha Noite, unha das máis famosas da cultura occidental.Adam Oehlenschlager escribiu o seu drama Aladddin no 1805.
                                                                                                                   
Paula García Tejedor  -  3º ESO -B   

martes, 14 de febrero de 2012

SAÍDA AO XEO


                O día 16.01.12, os alumnos de 3º curso da ESO do Colexio Sagrado Corazón, Franciscanas fomos patinar á pista de xeo do Coliseum da Coruña.
                A saída estivo organizada, como tódolos anos anteriores, polo profesor de Ed. Física José Cadarso. O obxectivo do profesor e da saída era fomentar o deporte dunha maneira sana, divertida e na compaña dos nosos compañeiros. El e maila profesora de Bioloxía e Física e Química, Cristina, viñeron con nós para cumprir a función de supervisores.

                Nós, xa afeitos á patinaxe sobre xeo dos anos anteriores, desenvolvímonos ben, iso sí, cun pouco de axuda dos deslizadores que estaban por toda a pista. Aínda así, uns fixérono mellor ca outros.

                Patinamos nun tempo estimado dunha hora e cuarto. O tempo transcorreu sen accidentes, á diferenza do ano pasado, no que un rapaz rompeu un brazo.

                Durante o tempo que estivemos na pista, a profesora de Física e Química fixo fotos dos alumnos patinando para telas como recordo.

                Ao final da hora e cuarto, os alumnos deixamos de patinar para ir ás clases.

                Foi una experiencia divertida, na que pasamos un bo rato facendo deporte cos nosos compañeiros, na nosa opinión foi una bonita saída que debería facerse tódolos anos.
Adolfo Villaverde Turnes 3º ESO - A
Denise Suárez Barral 3º ESO - A
Imaxes cedidas por Laura Pazos Rey 3ºESO - C

domingo, 12 de febrero de 2012

A todo porco...

   Ben é certo que polo San Martiño, o 11 do mes de Santos (novembro), nas aldeas adoitan facer a matanza do porco; mais... pódese levar a cabo calquer outro fin de semana despois do 11, sempre e cando vaia moito frío.
   Na aldea de Marco Antonio Álvarez Sánchez de 3ºESO-C mataron tres porcos e, grazas á súa labor de reporteiro, subimos ao noso blog algunhas das imaxes, advertindo por adiantado da dureza dalgunhas delas.
   Ao porco non se lle dá de comer o día anterior, algúns din que sabe que vai morrer e por iso, golpea a porta durante toda a noite ou como outros acostuman a dar a entender: "levántase sete veces para comer ao seu dono".
   Pois ben, como unha imaxe vale máis que mil palabras; aquí está todo o que lle aconteceu ao porco:


 
Cólgase polas patas traseiras o porco.

Antes empregaban o coitelo, agora: méteselle un tiro na testa.




  
Métese en auga fervendo e despois quítaselle a pel e límpase ben coa axuda dun soplete.







Unha vez ben limpo por dentro e lavadas as tripas para enchelas logo cos chourizos, déixase colgado para que enfríe.




Vaise despezando, preparando a cachucha, a sesada, o unto... salgando..











Xa queda lista a carne dos chourizos e todo o necesario para a laconada agora que chega o ENTROIDO.
Grazas a Marco e á súa familia por achegarnos a tradición e o bo facer das nosas xentes; xa nos contaredes máis.